الخطوات الضرورية لشراء سيارة مستعملة

الخطوات الضرورية لشراء سيارة مستعملة :

كتفكر تشري سيارة مستعملة، ضروري تدوز من هذه المراحل باش متتعرضش للنصب :

1- كتقلب اوراق السيارة مزيان خصوصا البطاقة الرمادية و لافيزيت و الضريبة و كتشوف واش الاسم ديال البائع هو لي كاين في اوراق السيارة كلهم، و واش المعلومات ديال السيارة صحاح، خود وقتك و البائع لي غادي يبغي يزربك عرفو مخلوض، وداكشي ديال الوكالة و التكليف و مول السيارة مسافر ...الخ من الأحسن غير بعد منو.

2- كدخل لهاد الموقع لي ديال الدولة، و كدخل المعلومات ديال السيارة و كاتشوف واش مافيهاش حجز، او مشكل، او سرقة.... الخ
‏http://www.assiaqacard.ma/opppub/

3 - كتدي السيارة عند ميكانيك و طولوري وتهالا فيه مزيان باش يشوف ليك السيارة واش مافيهاش مشكل او فايت دارت حادث.

4- كتمشي عند دار الضريبة او وافاكاش أو تدخل لهاد الموقع:
Vignette.ma
و تسول علي السيارة واش مخلصة كلشي السنوات.

5- كدوزلها لافيزيت عند البلاصة لي بغيتي انتا و انتا لي كتخلص.

6- كتكاتب مع البائع و كتاخد من عندو السويرتات و البطاقة الرمادية و كتعطيه فلوسو، و تيوصليك السيارة ديالك فين بغيتي خيت هو لي عندو التأمين.

7- كتمشي عند سيرفيس ديمين دفع الملف في أقرب وقت، حاول ماتفوتش شهر.

8- كتصاوب التأمين ديالك و كتحرك مع راسك بالسيارة.

9- ممكن كذلك تخسر واحد 1000 درهم وتبدل لبلوك  وتلكموند ولقفل ديال باب تحسبا لا اكونوا مصيبين عليهم ..